Шаховскиот клуб “АЛКАЛОИД” ја одбрани шампионската титула

На јубилејниот 25-ти Екипен Шампионат на Македонија, екипата на шаховскиот клуб „Алкалоид“ ја одбрани шампионската титула и повторно убедливо и сигурно го освои првото место. Ова е петта едноподруга титула, односно 19-та шампионска титула во 25-те настапи !! Алкалоид ги победи сите свои противници и освои максимални 10 бодови во петте мечеви, при што го изедначи минатогодишниот рекорд со просечни 5,5 освоени поени во секој меч - оставајќи им притоа на своите противници по едно реми во секој меч.

Екипата на Алкалоид настапи покрај домашните играчи Филип Панчевски, Трајче Недев, Звонко Станојоски, Дејан Стојановски, Драгољуб Јаќимовиќ и Влатко Богдановски, засилена со елитните светски велемајстори Павел Елјанов (УКР),  Дмитри Андреикин (РУС), Дмитри Јаковенко (РУС) и Јуриј Криворучко (УКР). Единствена промена во екипата од минатата година е Павел Елјанов кој беше во составот на Алкалоид во 2013 година. Планирано е на Европскиот Клупски Куп во борбата за еден од медалите Алкалоид да настапи засилен со уште двајца силни велемајстори.

Ждрепката одлучи да дербито биде уште во првото коло, односно уште во првото коло настапивме против главниот конкурент Гамбит Асеко – Скопје (а веќе во второто коло против вториот конкурент Гостивар – Гостивар). Во дерби мечевите екипата на Алкалоид настапи во својот најсилен состав, играјќи со тројца странски играчи. Со убедливите победи од 5,5:0,5 во првите две кола практично шампионатот беше решен. Во преостанатите три кола екипата на Алкалоид не дозволи никакво изненадување и со сигурни победи (5,5:0,5) го освои првото место. За одбележување е дека оваа година играчите на Алкалоид не загубија ниту една поединечна партија.

За Алкалоид овој Шампионат претставуваше можност за уигрување на составот и подобрување на атмосферата во екипата, но и како прв чекор, односно анализа и продолжување на подготовките за главниот овогодишен екипен турнир т.е. настапот на Европскиот Клупски Куп кој оваа година ќе се одржи во Нови Сад во периодот 06-12.11.2016 и на кој ќе земат учество најсилните европски клубови.